EL BARBISIN Ritmo lento di D’Anzi – Bracchi

Me fan murì del rid tutta la gent
Che vorarisen fa quel che fo mi
San minga che mi sont on prepotent
San nò che mi quand parli foo stremi
E me fo rispettà cont el cortell.
Son pussee svelt d’un gat e d’un usell
E me fo rispettà cont el cortell.

Mi sont el Barbisin de la Mojazza
‘Ndu spui fo ‘na busa grossa inscì
Cont una sberla rompi ona ganassa
Quand parli tremen tucc davanti a mì.
Mi mangi carna tutta settimana
De succher e caffè ghe n’ho on vagon
Polaster e buter formagg de grana
E on magasin de cass pien de saon.
Sont prepotent e nient me fa paura
E giri in lungh e in largh per la città
Me lassa perd perfino la questura
Perchè col Barbisin gh’è nient de fà.
Mi son el Barbisin de la Mojazza
E nient al mond me podaria stremì
Per mi pientà di gran a l’è una bazza
A taccà lit cont mi, voer dì murì.
G’ho tre moros per gamba e dò per brasc
Che se velenen dò o tre volt al dì
Chi mangia i sofranei, chi derva el gas
In trop innamorà gh’è nient de dì
Apena fo on passin foera di cà
On reggiment de donn in lì a spettà.

Mi sont el Barbisin de la Mojazza
E mangi e bevi a sbafo tutt el dì.
Cont mi gh’è no de fa trop el ganassa
Se guardi in faccia a vun t’el fo stremì
Mi tiri de cortell come una bissa
‘Ndue passi, tremen tucc del gran spavent
E quand me sbatti in mezz in d’ona rissa
Gh’è per lo men quaranta  feriment.
Le gent la dis “chiamate la questura”
Bisogna denunciall e fall ligà
Peu tremen del spaghett e de paura
Perchè col Barbisin gh’è nient de fa.
L’è quest el Barbisin de la Mojazza
Che l’imperava almen trent’anni fa
Ma el manganel e on manich de ramassa
T’han liberà per sempre la città.